شكرا سيدي الرئيس

شكرا سيدي الرئيس يعطيك الصحة انت احسن رئيس في تاريخ الجزائر فبفضلك سيدي فقط رانا طورنا و اصبحنا دولة متقدمة بسبب سياستك الراشدة و عبقريتك التي فاقت عبقريات رياس كبار في العالم
شكرا عبد العزيز بوتفليقة فبفضلك فقط الشعب كامل سكن و العشب راه ياكل مليح و اصبحنا اليوم نصدر الحليب و السمك لاوربا و اصبحت التريسيتي ما تروحش ابدا
شكرا سيدي الرئيس ف15 سنة تمنينا لوكان بقيت 100 سنة تحكم فينا لانه بفضلك رانا ناكلو الكروفات و نشروها ب 40 دج للكيلو و الاطفال الصغار ولاو يشروها هاد الكروفات من عند الكيوسك في بلاصة شيكولا البيلا
شكرا سيدي الرئيس فبفضلك و الحمد لله رانا نمشو في الطريق و مكاش لحفر و بفضلك القانون راه فوق الجميع و لحقنا حتى نشارعو الوزير و القاضي يحكم عليه بالحبس
شكرا سيدي الرايس فانت رمز لعيش الجزائريين الكريم فبفضلك ولينا نشربو الجو تاع التشينا فري و ليس اغوماتيزي
شكرا فبفضلك سيدي الرئيس رانا نشوفو كيفاش اصبح رئيس تاع بلاد بحجم فرنسا و بريطانيا يجي يداوي عندنا في مستشفى زميرلي و مستشفى مايو و عند الاطباء تاعنا و نخلصو عليهم
شكرا سيدي الرئيس و ربي يطولك في عمرك لان الدينار في وقتك راه غالي و في مرسيليا الفرنسيين راهم يبيعو في الدينار تاعنا كعملة صعبة
شكرا سيدي الرئيس كي راك تخلصنا مليح و لحقنا حتى وين الطالب قبل ما يكمل الليسانس بلاصتو راهي واجدة في العمل و الاجرة ابتداءا من 10 ملايين سنتيم
شكرا سيدي الرايس لان الشرطة راهي تخدمنا و واقفة على احتياجاتنا و كي نطيح اونبان في الطريق نديرو سطوب للسورينتو تحبسلنا و تلحقنا و يزيدو يعطونا 1000دج حق الكاسكروط
شكرا سيدي الرايس فبفضلك الحليب راه متوفر في الكارطون ب 10 دج للتر و نشربوه سخون ما عندو ربع ساعة ملي خرج من بزولة البقرة
شكرا سيدي الرايس رانا ناكلو في اللحم و البيفتيك ليل نهار و لحقنا حتى وين درنا باللحم حشوة البقلاوة
شكرا سيدي الرايس على النعم لي اعطيتهوملنا بفضل سياستك و الدورو لي ما لقيتوش و ين ديروه باسكو الشعب راه عايش رحتو شريتو نوار و بعتو دي بوكي دو فلوغ للشعب و كل ما نوضو صباح نلقاوه مع رسالة من عند الرئاسة تقولنا بونجوغ شعبي العزيز شم الورد فالحياة جميلة
شكرا سيدي الرايس فبفضلك ما وليناش نحرقو لاوربا ولاو اوربا يحرقو لعندنا و نخدموهم في بيوتنا يرمولنا الزبل و يسيقولنا بيت الراحة بفضلك رجع مانويل و البيرتو يخدم عند العمري و الجيلالي
شكرا سيدي الرايس فبفضلك تنحات السيركيلاسيون و رجع الخدام يدير مالرغاية للعاصمة 3 دقائق فقط و هو يخدم على 8 صباحا ينوض على الثمنية غير ربع يدير الجال و على الثمنية غير خمسة يخرج من دارو و على الثمنية غير زوج دقايق يلحق
شكرا سيدي الرايس زيد عهدة رابعة و خامسة و سادسة و حتى و تموت لا قدر الله ابقى نتا رئيسنا سيرنا بالروح تاعك نحنطوك سيد الرايس و نيدروك في قصر المرادية و ما تتكلمش معانا سيد الرايس ما تعييش روحك راك ميت حنا غلطنا معاك و نتا راجل اسمحلنا سيد الرايس و شكرا على واش قدمت